SOCODKA GAMMAANKA

Date: November 20, 2018Author: Xoosh Docol Curdan0

Socodka farduhu waa kala duwan yahay sida marka ay taagan yihiin, markay daaqayaan, marka la fuushan yahay, marka lagu dabbaal degayo, Iwm, waxaana ka mid ah kuwaan;

1. Taxaash ~ waa marka farasku daaqayo ama si caadiya u soconayo, kolkaan lama saarna waa caddaysan wax salab ahna ma saarna.
2. Taxaab ~ Waa marka faraska la hoggaaminayo, waxaa saarnaan kara Koore waxaase khasab ah jaraha.
3. Goros ~ Waa marka farasku taagan yahay, oo uu lugna ku istaago lugna laabto, tan waxaa ka siman gammaanka oo dhan.
4. Kadle ~ Waa socodka marka faraska la fuushan yahay ee uu sida deggan u socodo. Wuxuu u dhow yahay taxaash waase la saaran yahay kan.
5. Xawaare ~ Waa orod dhex-dhexaad ah, oo aan ahayn kii ugu dambeeyey ee socodkiisa, waase socod cadow aan dheerayn looga baxsan karo, waana kan geela lagu dhaco.
6. Xawli ~ Waa socodka ugu dambeeya ee dheeraynta, socodkaan waa kan cadowga looga baxsado, ugaadhana lagu soo qabto.
7. Dakaan ~ Waa socodka uu faraska ku daalay lana istaagay daal aawadiis, waxay isu dhow yihiin kan hoose;
8. Laabciir ~ Waa in farasku suu u ordayo oo horay ama gees-gees u dhaco, tani waa kufidda faraska.
9. Hardaf ~ Waa kolka uu farasku afar qaadlaynayo, oo labafa jeenina mar qaadayo labada lugoodna mar qaadayo.
10. Raqle ~ Waa socodka farasku afartiisa addinba midba mar qaadayo, wuxuu soo shaabbahaa kadlaha raqlahaase dheereeya.
11. Jeelag/Jeefag ~ Waa socodka farasku dheeraynayo haddana uu gooladaynayo ama leexleexanayo. Socodkaan waxaa adeegsada fardaha tabcooyinka dagaalka sida hufan loo baray kuna dhaari qaatay.
12. Dooyo ~ Waa marka farasku tartiib u soconayo, lana fuushan yahay oo lagu raaxaysanayo ama lagu xarragoonayo.
13. Gurdan-raac ~ Waa socodka fardaha kale lagu dhaco inta la dhex galo fardaha la didsado laguna dhaco faras la fuushan yahay.
14. Gaaddo-buur ~ Waa socodka faraskoo ordayo lagu soo dhufto jaraha oo lagu soo jiido xakamaha, kolkaasna uu bariiqdo.
15. Hawalis ~ waa jeeraaraha ama wareegaysi socodka, kan waxaa la adeegsadaa xilliyada dhoolla-tuska, iyo dabbaal degyada arooska iyo caleemo saarka salaaddiinta.
16. Kabtin ~ cayrin xawaaraha ka hooseysa, waa marka jarehayuhu inta qotinka hore bogga ku nabo asaga iyo faraska la kala garan waayo intuu rikaabbada faraha lugaha fooddooda surto.
17. Qaatimayn ~ waa marka farasku durduriyo, ay ka tahau cayaar iyo barwaaqo dar la’.

Gabay : Sayidka

Xawaariyo, kabtiyo, raaxo iyo xawli iyo jeelag !!

Ciddii taqaan noocyo kale oo socodka fardaha ah, way nagu biirin kartaa wixii qaldanna waa la iga sixi karaa.